ഓം പ്രകാശ് വാത്മീകിയുടെ ഹിന്ദി കവിത

മിന്നാമിനുങ്ങ്

-ഓം പ്രകാശ് വാത്മീകി

കറുത്ത രാത്രിയില്‍

മിന്നാമിനുങ്ങ് തിളങ്ങുന്നു

ഇരുട്ടിലൊരു ചെറുസൂര്യനുദിച്ചപോലെ

പുറകിലൊരു

പ്രകാശത്തിെന്‍റ ബള്‍ബും തൂക്കി

മിന്നാമിന്നി കറങ്ങി നടക്കുന്നു

ഇരുട്ടില്‍ വഴിതെറ്റിയലയുന്ന

അര്‍ഹതയുള്ളവര്‍ക്ക്

വഴികാട്ടാനായി.

മിന്നാമിനുങ്ങിന്‍റെ ഈ ചെറു തിളക്കം പോലും

കൂരിരുട്ടിലെത്ര വലുതാണ്

ഈ പ്രകാശത്തിന്‍റെ ശരിയായ

അര്‍ത്ഥം

യുഗങ്ങളായി

ഇരുട്ടിന്‍റെ ലോകത്ത് കഴിഞ്ഞവര്‍ക്കേ

അറിയൂ..

ജനനവും

മരണവും തുല്യമായവര്‍ക്ക്..

പൂര്‍വ്വികരില്‍ നിന്നും

പാരമ്പര്യസ്വത്തായി

അന്ധകാരത്തിന്‍റെ അടിമത്തം

ലഭിച്ചവര്‍ക്ക്...

വെളിച്ചത്തിന്‍റെ മൊത്തക്കച്ചവടക്കാര്‍

ഒരു ദിവസം

മിന്നാമിനുങ്ങിന്‍റെ

ഈ ചെറുവെളിച്ചവും പറിച്ചുമാറ്റും

അവരീ വെളിച്ചം പാക്കറ്റിലാക്കി

കമ്പോളത്തില്‍

വലിയ വിലയ്ക്ക് വില്‍ക്കും,

സംസ്കാരത്തിന്‍റെ ലോഗോ പതിച്ച്.